السلام عليكم ورحمة الله وبركاته
كتييييير بنسأل ده يجوز ولا لايجوز
ولو قيل لا يجوز نضايق ونحس أن الدنيا متضيقة علينا

وأحيانا حاجات معينة تبقى مباحة لكن في وضع معين تبقى لاتجوز فتلاقي الناس بقى اتخنقت وتقول هو إيه ده وكلام كده

أنا عايزة أقول اننا مش المفروض نبقى بس عارفين ده يجوز وده لا وخلاص على كده

لا في فكرة معينة لازم نكون فاهمينها كويس أوي
وهي إيه بقى؟؟


بالنسبة لزي المرأة مثلا .. ادام خالها ايه؟ طيب أخوها طيب النساء اللي زيها والكلام ده كله

لا افهمي حاجة واحدة.. أن الغرض هو الابتعاد عن الفتنة


يعني إيه؟؟

يعني انتي هتلبسي مثلا بلوزة أنتي شايفة أنها عادية أنك تلبسيها أدام أخوكي

لكن ممكن أخوكي يتفتن لما يشوفك بالبلوزة دي



بجد لما يبقى أخوكي ده مثلا مش متزوج وأنتوا عارفين فتنة النساء خطيرة ازاي لدرجة أن الرسول صلى الله عليه وسلم وصى الناس انهم يتقوا الدنيا ويتقوا النساء رغم أن النساء تدخل تحت الدنيا بردو


فلازم أنتي تبقي فاهمة مش عايزة يكون في فتنة أبدااااا بسببي علشان الذنب العظيم اللي ممكن آخده بسبب كده


طيب ازاي بقى مايكونش في فتنة ؟

في أي حاجة تعمليها ومتخيلة أنها ممكن تفتن شاب (أو تعجبه)

مش في بنات أحيانا بتتعمد تعمل تصرف معين أو تقول كلمة معينة أو تتكلم بأسلوب معين علشان تلفت نظر الشباب ليها أو يعجبوا بيها؟؟

ده أنتي كده بتفتنيه .. ودي خطيرة جدا جدا أنتي مش عارفة أنتي كده بتعملي فيه إيه


يبقى خلاص أنا عندي الفكرة أني ماأفتنش ولا شاب بأي طريقة

واحدة مثلا بقى مش منتقبة تقول النقاب اختلفوا عليه بس هي شديدة الجمال..طيب انتي كده ممكن حد يشوفك ويُفتن بيكي يبقى تلبسيه من باب الاحتياط (ومش معنى كلامي أن النقاب سنة أو فرض أنا مش بتكلم في الحكم)

واحدة شايفة أن لبسها كويس بس بتعمل فيه أي حاجة كده علشان يكون شكله حلو
طيب ما أنتي كده ممكن تفتني شاب


نفس الكلام في صوتك ..عارفين أن صوت المرأة مش عورة لكن الخضوع بالقول هو اللي مشكلة

والخضوع بالقول يعني أنك تحسني في صوتك أكتر وترققيه وتحاولي تخليه حلو يعني


يبقى عايزين بقى خلاص نبقى فاهمين الفكرة إيه بالظبط في الموضوع ده ومش عايزين نجادل تاني في أي مسألة خاصة بالموضوع ده..


نفس الكلام في الموسيقى

يقولك مثلا الأنشودة المفروض تكون خالية من الموسيقى والدف والمؤثرات

طيب أولا ده ليه؟
سبحان الله المسلم الملتزم تحسي ان المفروض يكون عنده وقار كده وده عمره ما هيحصل لما يبقى قاعد يسمع حاجة فيها موسيقى والكلام ده كله
ممكن تقولي طيب الموسيقى ماشي الدف أيه المشكلة اللي فيه؟؟

هقولك جربي تفضلي أسبوعين تسمعي أناشيد خالية من أي مؤثرات

لو بعد الأسبوعين سمعتي أي حاجة كده بالغلط فيها دف هتحسي أنك عايزة تقولي إيه ده إيه ده إيه ده إيه اللي بيحصل ده كله

وبجد وعن تجربة
أنا قبل كده كنت بسمع للأسف بالدف وكده لكن بعد كده لما بقيت حريصة أني ما أسمعش إلا اللي خالي من أي حاجة لما أجي أحمل مثلا أنشودة وألاقيها بدف أحس أن أنا في فرح واتخنق جدا


طيب غير بقى الكلمتين دول..أحيانا نقول دي فيها مؤثرات ولا لا؟
يقولولك مثلا هي فيها مؤثرات بشرية بس قوية شوية فبلاش ..تقولي طيب ليييييه والكلام ده كله؟؟


لا خلاص بقى فهمنا الفكرة في إيه مش عايزين جدال تاني


هتمشي حياتك كلها بالطريقة دي .. ده الغرض منه كذا يبقى هو وأي حاجة تشبهه في نفس الفكرة يبقى خلاص انتهينا

زي مثلا الصور اللي هي التماثيل فكرة حرمانيتها أنها مضاهاة لخلق الله عز وجل
يبقى ده لما يبقى في أي حاجة تانية زي أنك ترسمي صاحبتك ولا ترسمي قطة ولا أي حاجة من دي
خلاص أنتي فهمتي الفكرة في إيه ومش هتجادلي فيها تاني



أتمنى أن الفكرة تكون وصلت
وإن أصبت فمن الله وحده، وإن أخطأت فمن نفسي ومن الشيطان


بارك الله فيكم